حد سمع عن الغوريلا ماركتنج ؟ مين صاحب الإستراتيجية دى فى التسويق ومعناها ايه ؟ وازاى أقدر أطبقها فى البيزنس بتاعى ؟

أول واحد أخترع المسمى ده والنوع ده من التسويق هو "Jay Conrad Levinson " وده كان فى عام 1984 م . جى كونراد أمريكى الجنسية أتولد فى شيكاغو وأستغل دراسته فى علم النفس علشان يعمل حاجه مختلفة فى التسويق وبالفعل عمل طفرة فى علم التسويق الحديث .

كتب كتابه الشهير " Guerrilla Marketing " واللى واخد 3.9/5 على موقع Good Reads وباع أكتر من 21 مليون نسخة حول العالم .

أتخرج من جامعة كولورادو وأشتغل مدير تسويق فى "Leo Burnett " وأشتغل كمان كنائب رئيس فى " J. Walter Thompson " وحالياً بتسمى إختصاراً ب " JWT " . جى سمى الكتاب بالغوريلا ماركتنج إعتماداً على فكرة ومبدأ حرب العصابات وكلمة Guerrilla جات من الكلمة الأسبانية Guera ومعناها حرب و Guerrilla معناها الحرب الصغيرة .

وده ببساطه نفس المبدأ اللى أستخدمه جى فى التسويق ومعناه أنك تنتشر بسرعه وبشكل مفاجئ وبتكلفة أقل وده ساعد كتير أصحاب ال Small Business أنهم ينتشروا فى ظل الظروف المالية الصعبة اللى بتواجه أى صاحب شركة معندوش رأس مال كبير لأن الأستراتيجية دى فى التسويق بتعتمد أكتر حاجة على الإبداع والإبتكار مش على الميزانيات الضخمة اللى بتصرفها الشركات الكبيرة.

نجاح الفكرة خلى شركات كبيرة زى كوكاكولا تنفذ ده كحملات مساعده فى حملاتها التسويقية الكبيرة جى قال عن الجوريلا ماركتنج " يمكننى وصف روح الغوريلا ماركتنج على أنها تحقيق الأهداف المألوفة مثل الربح والإستمتاع من خلال طرق غير تقليدية كاستخدام الطاقة الجسدية بدلاً من النقود " جى حط شوية أساسيات علشان تنفذ الإستراتيجية دى فى التسويق .

أساسيات إستراتيجية الغوريلا ماركتنج :

1- الغوريلا ماركتنج بتخدم أكتر ال Small Business وده لأن إنتشاره واسع جدا فى نجاحه ده غير التكلفة المحدودة للنوع ده من التسويق ... بس زى ما نجاح الإستراتيجية بيحقق إنتشار رهيب كمان فشل الإستراتيجية بيعمل إنتشار مرعب علشان كده الشركات الكبيرة بتكون حذرة جداً فى أستخدام النوع ده من التسويق .

2- الإستراتيجية بتعتمد أكتر على علم النفس مش على الخبرة والمفاهيم التقليدية للتسويق .

3- روح التعاون حتى مع المنافسين بدل التنافس دون جدوى .

4- التركيز على عدد العلاقات اللى ممكن يكتسبها المسوق كل شهر .

5- التركيز على العملاء الحاليين وزيادة التعامل معاهم بدل من الإهتمام بكسب عميل جديد .

6- إستهداف الأفراد والمجموعات الصغيرة .

7- كسب ثقة العملاء بدلاً من محاولة البيع فقط .

8- لازم يكون فيه إستمرارية للنوع ده من التسويق .

9- التركيز على منتج واحد بدل تشتيت الجهد على أكثر من منتج وأكثر من خدمة .

10- مقياس النجاح هنا مش الفلوس لكن بحجم المكاسب والإنتشار وبناء البراند عند العميل المحتمل.

بكده نكون فهمنا الغوريلا ماركتنج ولو فيه أى سؤال سيبه فى كومنت